زمن.الفضائح /بقلم الزروقي جواد
🌷زمن الفضائح 🌷
كثرو علينا الفضائح
تعرمو علينا بالعرارم
ما بقينا عارفين
شكون المظلوم
وشكون فيهم الظالم
كلشي ولا يهدر
كلشي ولا يصور
فالفضايح راه ينشر
هدا يبكي.. هدا يفرح
هدا يغني...هدا يشطح
ما جايب للدنيا خبار
ولا منين يجيب خبز الدار
كثرو علينا البواق
كلشي ولا عايش بالزواق
ناس خايفة من الزواج
وناس فمحكمة الطلاق
ضاعت الحشمة بين الناس
كثر الغيار والعار
كلشي ولا مفضوح
كيف الشارع كيف الدار
سكنات عقولنا الأمية
كل نهار فضيحة جديدة
وقضية تنسيك فقضية
الناس راه تضحك
تقول الأمور عادية
حيت هدا زمن الفضايح
كلشي على هواه
كل وحد فين غادي رايح
تالف و سايح
فا زمن الفضائح
بقلم : الزروقي جواد
المغرب
تعليقات
إرسال تعليق